مساء الخير
حضرت أفلام جيدة، وحبيت أشارككم فيها، وأعتذر فيها حرق للأحداث كبير 😅😅، واللغة المستخدمة عامية.
فيلم Peeples
هذا الفيلم بحكي عن بنت تقدملها الكثير وأبوها رفضهم، لحد ما حبت واحد وما كانت حابة يتعرف على أبوها لأنه شوي معقد، بتمر الأحداث وبتقابلوا وببلش الأب يطلع بالشب كل العيوب الي هي أصلا مش موجودة فيه، وبحاول الأب يظهر للشب انه عيلته صادقة وما بتغلط، والشب بشوف بلاوي العيلة بس ما بحكي، لحد ما يجي اليوم الي يواجهه فيها وبطلب الشب من البنت انها تروح معه، بترفض وبتضل مع أهلها، وبتكتشف انه الشب كان صادق، فبتلحقه وبتعتذر منه بس ما بقبلها، لحتى يجي الاب ويعتذر لوقتها الشب بقبلهم وبتراجع عن قراره.
تقييمي 6/10
فيلم Buried Secrets/ Hidden Intention
بحكي عن خالة دخلت بحياة الأهل بعد ما ماتت اختها، وما حدا اصلا بعرفها، بتصير تتقرب من الاب والأب بوقع بحبها، بتتقرب من صاحب البنت وبتخليه يترك البنت، بعدين بتشتغل بالشركة الي الأب بشتغل فيها، اول مرة بترقى واحد وبوخذ وظيفتها بتقتله، وبعدين بتحصل على الوظيفة وبكون مكتبها بجنب مكتب الاب، البنت ما بتتقبلها وبتحاول تبعد الاب عنها عالفاضي بكون الاب مغسول دماغه، الصاحب بعترف للبنت شو عملت فيه الخالة، وبتفقوا يفضحوها، وبكتشفوا جثة الخالة الحقيقية، وبس البنت تكتشف بتحكي لابوها بتسمعه الخالة بتروح عالدار بتقتل الصاحب وبتحاول تقتل البنت والاب لما البنت تبعثله صورة الخالة بتصل بالشرطة، بتحاول تخنق البنت وبتحكيلها انها كانت تبحث عن عيلة هي وخالة البنت، بتنخنق البنت باللحظة الي بيجي فيها الاب، فالبنت بتضرب الخالة المزورة وبتقضي عليها، بنهاية الفيلم البنت بتحكي لابوها اوعدني بشيء واحد؟ انه ما نستقبل حدا من اقاربنا البعاد في منزلنا مرة ثانية.
تقييمي 9/10
فيلم Fatal Beauty/ Fallen Queen
بحكي عن زوج اسمه تريفور بودع زوجته الي رايحة على الشغل بتناديه جارته يساعدها بالفرن او الجلاية، بساعدها وبتعرفه على حالها، بتوهمه انها عندها زوج، بعزمهم عالغدا بتحاول تتصاحب مع بنته بالعشا، وبكتشفوا انه اخوها مش جوزها، بعديها ثاني يوم بتصوره وهو بعزف وبتهدي بنته هدية، وبتغلط معه وكله مسجل، وبتحكيله انها زعلانة ولازم يراضيها بقطع اصبعه، بعد ايام بتقوى علاقتها ببنته بخف عقله وبحاول يوقفها لحد ما تعترف انه خربلها مستقبلها لما كانت بتقدم لمسابقات ملكة الجمال وكان هو الحكم، بتذكر وبحكي لمرته نص التفاصيل بتهدد الجارة، اليوم الثاني بخطفوا بنتهم الشرطة ما بتساعدهم، بيجيهم دعوة من الجارة واخوها انه يجوهم عالمسرح، بروحوا يحضروا وهناك بقدموا تريفور وبعدين بتيجي بنتهم على المسرح زي المغسول دماغها، بحاولوا اهلها يجيبوها لكنهم مهددين من اخو الجارة، والبنت بتقعد تغنيلهم اغنية للجارة الحقيرة، بحكوا للاب يا يفوز البنت او بتموت امها، فوز البنت وشردوا مع البنت، في الطريق البنت خلت حالها بدها تتقيأ، ولما حست الجارة انها بدها تتقيأ عليها، شردت البنت، مسكتها وحدة وقالت بدها تستنى الشرطة، ضحكوا عليها بس البنت عضتها وشردت، ولحقوهم الاهل وانقذوا البنت.
تقييمي: 5/10
فيلم The Trouble With You
بلشت أحضر من لما وحدة شرطية القت كلمة في حفل تأبين زوجها، بيوم من الأيام بلقوا القبض على مجموعة، وفي واحد منهم برضاش يقيم القناع عن وجهه لكن لما يشوف خاتم الشرطية بحكيلها انتي زوجة فلان، انت اكيد مرته ايفون انا الي صنعتله هاد الخاتم، وقت قضية سرقة محل المجوهرات، وبحكيلها كيف كان زوجها فاسد، بتنصدم وبتحاول تطلع الشخص الي سجنه جوزها لمدة 8 سنين، بطلع من السجن وهو بحكي مع حاله، بتقابل مع حبيبته الي استنته طوال هاي السنوات.
بتعزمه على مطعم، بتركها وبطلع يشتري دخان، بلبس كيس زبالة على راسه وبسرق محل دخان، بدخن وبرجع لحبيبته، كل هاد والشرطية بتراقبه، بروح هو وحبيبته على ملهى، بروح يطلب بيرة بسرق المصاري من شنتة وحدة، بتلحقه هي واثنين شباب برش بعينيها رذاذ الفلفل وبعض اذن واحد من الي معها، الشرطية بتوقف الناس لحتى يهرب بوخذ سيارة تاكسي وبنص الطريق السواق بخف عقله بعد ما يسمع حبيبته بتوبخه وبتحكيلي لساتك طالع من السجن جديد وبريء ليش عظيت ذان هذاك وليش ضربتهم، السواق خاف، بنفس اليوم بتضل الشرطية لاحقيته لحد ما يقفز بالبحر، بتفكره بده ينتحر بتلحقه بتخلعله كتفه ههههههه، بتصاحب هو واياها وبحكيلها قصته بتحكيله بحقلك تسوي اي اشي لانك انظلمت 8 سنين، بتمر الايام والمشاهد، لحد ما بيوم يعزمها على مطعم، ما بتقدر تقابله هداك اليوم، ولانه طلب بيرة كثيرة ومعوش مصاري بحرق المطعم، بتلاقيه الشرطية وبتنقذه وبنفس الوقت بترك حبيبته لانه ما بده حد يذكره باللي كان عليه، بروح على الشرطية وبحكيلها لازم انفذ الي بدي اياه، محل المجوهرات الي اتهموني بسرقته وسجنوني عليه 8 سنوات رح اسرقه اليوم، وبكون ربط الشرطية بالكلبشات، بلبس لبس ضيق ويصعد الى نفس سيارة الاجرة، بروح على محل المجوهرات بحكيلهم ينبطحوا ما حدا بفهم عليه شو بحكي وبتبلش الكوميديا، الامن براقبوا باللي بصير وواحد فيهم بقعد يوكل مقرمشات وواحد بقعد يعيط على المشهد هههههه، بتنسجن الشرطية وبتطلع، البريء بوخذ المجوهرات بدفنهن مع القناع بحفرة الدار وبرجع لحبيبته.
تقييمي: 9/10
فيلم The Cabin in The Wood
بشبه سلسلة hunger games بس بشكل أكثر عنف
مجموعة من الطلاب بجتمعوا بكوخ في غابة عشان يقضوا اجازتهم، بنزلوا على القبو وبشوفوا الشغلات الموجودة هناك، وحدة فيهم بتصير تقرأ بمذكرات بنت، بتتوقف عن كلمات باللاتينية، واحد منهم بحكيلها توقف حكي بتكمل، بتقرأ الكلمات بطلع زومبي من المنطقة القريبة، وببدأ الأكشن، بتنقتل بنت وبنصاب صاحبها وبدخل الكوخ وببلشوا الوحوش يحاولوا يقضوا عليهم، واحد منهم بحكيلهم لازم نضل مع بعض عشان ما يقدروا علينا بشم ريحة وبتغير رايه فجأة، واحد منهم اسمه مارتي بكتشف وجود لاسلكي، ببلشوا يهربوا من الكوخ وبنزلوا على مكان تحت القبو بكتشفوا انه مكان كان يستخدم للقتل، بضل منهم ثلاث، بطلعوا من الكوخ على باص، بموت واحد بضل اثنين، وبالاخر بتضل البنت.
بهاي الاثناء بنكتشف انه في عالم بتحكم بهاد العالم الي فيه الكوخ، وبكون فيه ناس ببلشوا يحتفلوا بالنجاح الي قدموا من خلال قتل الاربعة، بجيهم تلفون انه واحد من الاربعة لسى عايش، بلتقي مع البنت، وبكتشفوا وجود مصعد بطابق تحت الي تحت القبو، يبجي الجنود عشان يقتلوا الولد لانهم مطلوب منهم ما يقتلوا البنت لانها بتول، بعد الهرب بلاقوا مكان فيه بتجتمع الوحوش والاشباح، بطلقوها على الجنود، وهاي الوحوش بتطلع للناس الي كانوا يتحكموا بعالم الاولاد، وبتم ابادتهم جميعا ما عدا البنت والولد، ووحدة بتشرحلهم ليش تم اختيارهم بالذات لهاي التجربة، وبتنفهم القصة بنهاية الفيلم.
تقييمي 9/10
شكرا جزيلا لكم
كل الإحترام 🌷
إعجابإعجاب